Umphakathi kumele udlale indima enkulu lapho silwisa idrug abuse ezigabeni esihlala kizo, loba lapho sikhangele ukuthi umuntu usevela thola usizo ukuze atshiye izidakamizwa.
Ekhuluma emkhankasweni wokulwisa izidakamizwa owenziwe eMaphisa, umnumzana Taison Runatsa oweDepartment of Social development (DSD) ukhumbuze abantu ukuthi lo obethatha izidakamizwa osephume esibhedlela uyabuyela emphakathini, ngakho kuqakathekile ukuthi umphakathi uxhase lo ozama ukwekela izidakamizwa ukuze uhambo lwakhe lube lula.
“Sokumele sibuye sikuxhase, sidinge oSobhuku, sidinge omakhelwane labazali bakho bona abazancedisa ukuthi uphile impilo eqondileyo njalo uphile kahle. Lokhu kudinga ukuthi umuntu wonke esigabeni ancedise,” kutsho uRunatsa.
Uqhubeke waveza ukuthi lo osekhitshwe esibhedlela ngemva kokwelatshwa, uphuma abuyele kibo lapho ahlangana khona lobandlululo.
Lolu bandlululo lwenza inengi loba imuli ezinengi zingathandi, zingafuni ukutholakala zisondelelane laye.
“Isikhathi esinengi labo asebetshiye izidakamizwa bathwala nzima ngoba bayabandlululwa, bayakhethwa, akula muntu ofuna ukusondela eduze kwabo labo makhelwane bayabe bengasafuni ukuthi abantwana babo badlelane lalabo asebetshiye izidakamizwa,” kugcizelela uRunatsa.
Ubaba uLovious Khumalo yena omele ugatsha lwentsha ehofisini kahulumende eMatobo uthi indaba yezidakamizwa iyabaphatha abazali ngakho kumele baphatheke kumizamo yokuthi intsha ingathathi lezo zidakamizwa.
“Akulula ukukhuza umuntu ukuthi hayi mntanami yekela lokho, kathumeki phela. Umuntu nxa esethatha izidakamizwa, akula msebenzi wekhaya angawenza, ukupheka wena uzapheka ungumama uphekela laye umntwana,” kutsho uKhumalo.
Wagcizelela njalo ukuthi uHulumende uzimisele ukuthi uqede ukusetshenziswa kwezidakamizwa ngoba ziyatshabalalisa intsha abangabakhokheli bakusasa.
