Izakhamizi zaseMaphisa zitshengisa ukuzinikela ekubhadaleni imali ezaphathisa labo abancedisana lamapholisa ukuvikela umphakathi phecelezi Neighbourhood watch.
Ngokuzinikela kwabo, izakhamizi sezilungise uphawu (logo) lona oluzasetshenziswa ukubona inhlanganiso le esebenzisana lamapholisa ukulwisa ubugebengu emphakathini.
Ngokusebenzisana ndawonye sezibuye njalo zalungisa ugwalo oluzasiza ukuthi kwazakale labo asebebhadele, phecelezi i-receipt book. Lelibhuku lizancedisa ukuthi lalo obhadeleyo akwazi ukuba lobufakazi bokuthi usebhadele indleko zeNeighbourhood Watch.
Lomsebenzi wenziwe ngemva kokuthi izakhamizi ezazisemhlanganweni eJ Mafuyana zizinikele ukuthi zizabhadala imali engangamadola amabili awemali yaseMelika. Limali izancedisa iNeighbourhood Watch ukuthi ikwazi ukuthola izinto ezizabancedisa ukulwisa ubugebengu eMaphisa Growth Point.
IMaphisa Neighbourhood Watch yona esungulwe ngomnyaka ka2022 ukuthi ilwisane lobugebenga obesebumemetheka esigabeni, ibike ukuthi ihlangana lobunzima bokuswela izinto ezidingekayo ukuze bakwazi ukugcina umpahakathi uvikelekile.
Imali le ikhangelelwe ukuthi izancedisa ukuthi kutholakale okudingwa ngabeNeighbourhood Watch.
Ekhuluma emhlanganweni wezakhamizi emalangeni edluleyo umgcinisihlalo wekomithi yeNeighbourhood Watch umnumzana Misheck Ndlovu uthe badinga ukuncediswa ukuthi bakwazi ukuthola amafutha emota, izankosi, izibane zokukhanyisa ebusuku lokunye okuzakwenza bakwanise ukuqhuba umsebenzi wabo.
