News

By Correspondent

UMinister of State for provincial affairs and devolution esabelweni seMatabeleland South uDr Evelyn Ndlovu unxuse abantwana besikolo ukuthi bancedise ukulwisa izidakamizwa ngokuxwayisa abazali ngobubi bokunatha izidakamizwa ezifana lenjengu.

Lokhu ukuphawule ngoLwesihlanu lwakuqala enyangeni kaMbimbitho lapho ahlanganyele labavela kungatsha zikahulumende ezehlukeneyo, lalabo abasebenzela ngaphandle kukahulumnende (NGOs, CBOs) labanye abavela kumabhizimusi atshiyeneyo eMatobo District ukuze badobhe amaphepha khona kuyindlela yokuhlanza indawo.

Lapho ekhuluma labantu abekade bebuthanele lumsebenzi uveze ukuthi unanzelele ukugcwala kwezivalo zesidakamizwa esesihluphile elizweni laseZimbabwe.

“Ngibone lapha kugcwele izivalo zenjengu, lamambodlela enjengu. Injengu iyabulala! Ungabona umzali wakho ethwele injengu umtshele ukuthi Daddy injengu iyabulala, uzangitshiya ngibhadalelwe ngubani imali yesikolo?” kutsho uMinister.
Ugcizelele njalo ukuthi idrug abuse ayifuneki ezikolo, ezindlini, eMatabeleland South Province njalo laselizweni lonke.

UDr Ndlovu ugcizelele wathi, “sifuna abantu abaphilayo, asifuni izibotho, ngoba umuntu onatha injengu ucina eyisibotho.”

Uxwayise abazali ukuthi bangathathi loba ukutholakala bedakiwe phambili kwabantwana ngoba kuyi “nhlamba” ebantwaneni. Uqhubeke wathi lesisenzo senza abantwana bangalaleli loba ukuhlonipha abazali.

Ubuye njalo uminister wanxusa ikhansili yaseMatobo ukuthi ifake ucingo eTerminus eseMaphisa.

“Ngithe ikhansili ithenge ucingo, ibiye lindawo, ibelepholisa elilinda egedini (guard), wonke opaka imota yakhe lapha kumele abhadale imali ekhitshwa nyangazonke, yona ezasetsenziswa ukuhlanza lindawo. Wonke olemota engena lapha kungakhethelekile ukuthi yibhasi loba yiyiphi imota, nxa ezethwala abantu kumele ibhadale lemali,” kuphawule umhlonitshwa.

By correspondent
Kuvamile ukuthi njengabantu abagqugquzela ikakhulu intsha sikhale ngokuthi umphakathi awuphatheki kunhlelo ezidinga ukubathuthukisa loba ukuphatheka enhlelweni zokwakha ilizwe lapho okudingeka ukuthi labo bafake imibono yabo.

Imibono yabo le iyabe ingasiza ekwakheni amadolobho amahle loba ukuthi bathole ukusetshenzelwa yikhansili kangcono kulandelwa lokho abakuphawulileyo.

Nxa sikhangele ukuphatheka kwentsha ikakhulu sinanzelela ukuthi abalalo ulwazi lokuqakatheka kokuphatheka kwabo kunhlelo eziphathelani labo loba ukuya lalela lokubeka imibono yabo emihlanganweni ebizwayo.

Ngezinye izikhathi sinanzelela ukuthi ngenxa yokudinga ukuziphilisa abantu loba intsha ikhetha ukuya emsebenzini, lapha abathengisela khona loba lapho abenza khona imisebenzi yabo yezandla ukuze bazisize.

Ukuswelakala kolwazi lwenhlelo ezenziwa emphakathini loba imihlangano ephathwa zingaja zikahulumende kwenza intsha ingazitholi isiba lentshukuntshu yokuthi ihlanganyele labanye, ibuye njalo ifake imibono yayo ngokuthi kumele kwenziweni esigabeni okungabathuthukisa.

IMatobo Youth Development Initiative (MYDI) ithethe isinqumo sokunikeza iMatobo Rural District Council umabona kude yena ozasetshenziswa ukusakaza imibiko.

Imibiko le sithemba ukuthi izancedisa izakhamizi ukuthi zibelolwazi lwenhlelo ezenziwayo lezenziwa kudala yinhlanganiso ezehlukeneyo, lekhansili njalo lezinye ingaja zikahulumende ikakhulu eMatabeleland South.

Umabona kude lo ofakwe endaweni efinyeleleka lula kuzulu uzabe edlala imibiko le kusukela ekuseni ikhansili ivula kuze kubentambama lapho ikhansili isivala.