UWard 4 eMatabo useqale uhlelo lokwakhela abaswelayo abangamatshumi amabili lambili izindlu zokuhlala.
Uhlelo lolu soluncedise lentsha ukuthi ikwazi ukuthola imfundiso yemisebenzi yezandla.
Ukhansila kaward 4, uMxolisi Ncube, uthi basebenza labobhilida abawaziyo umsebenzi, laba abakhayo kukhangelelwe ukuthi bazatshiya befundise intsha ehlala emakhaya lumsebenzi ukuze bakwazi ukuzithuthukisa.
“Obhilida basebenza lentsha ukuze bayifundise lumsebenzi ngoba silentsha ehleliyo engenzilutho, ngakho loluhlelo lungabe lusiza abaswelayo njalo luyasiza nxa sikhangele ukufundiswa kwentsha imisebenzi yezandla,” kutsho uKhansila Ncube.
Loluhlelo lukhangelelwe ukuthi luzasiza abantu abangamatshumi amabili lambili kuward 4, abakhethiweyo bahlanganisela ogogo, kubelemuli eziphethwe ngabantwana besekusiba labantu abakhubazekileyo.
“Sathi sisenza iward development plan, loluhlelo belungolunye lwendingeko ezakhulunywa yizakhamizi lapho esasibonisana ngokumele kwenziwe kuWard,” kubika uKhansila.
Umsebenzi lo uqaliswe ekuqaleni kukambimbitho kumnyaka ka2024, sekuqale ukwakhiwa izindlu ezintathu, lezambuzi ezimbili ezigabeni ezehlukeneyo kuward 4.
Abanye abaphathekileyo kuloluhlelo ngabahlala ngaphandle kwelizwe (diaspora community) osomabhizimisi, labagebha igolide kuleyo indawo.
Lolu ngolunye lwezinhlelo ezikhangele ezezakhiwo, amanzi lokuhlanzeka endaweni kaward 4 eMatobo.
