By Correspondent
UProvincial environmental officer we Environmental Management Authority (EMA) kwele- Matabeleland South umnumzana Descent Ndlovu ukhuthaze abantu ukuthi baqine ngokubutha lokuqoqa izibi ukuze baziguqule zibanikeze imali.
Ukhulume lokhu embuthanweni wokubutha izibi eMaphisa ngolwesihlanu lokuqala enyangeni kaMbimbitho.
Wazise abantu ukuthi ingcekeza ingabuthwa iqoqwe bese ithengiswa , ingakwanisa ukubanikeza imali.
“Okukhona yikuthi ingcekeza leyi yimali ngoba ingathathwa iguqulwe ikwazi ukunikeza abantu imali, ithengiswe ingcekeza abantu bathole imali. Okutsho ukuthi asibekeni indawo lapho esizaqoqa khona ingcekeza, siyehlukanise ngoluhlu lwengcekeza ukwenzela ukuthi sithathe lokhu okubolayo siyefaka ezingadini kubengumquba,” kutsho umnumzana Ndlovu.
Ubuye waxwayisa abantu ukuthi ukulahlwa kwengcekeza butshapha kubangela imikhuhlane etshiyeneyo esigabeni, ngoba ingcekeza le ingacina isemanzini esiwanathayo.
Kumele siqakathekise ukugcina imvelo yethu ihlanzekile, singekela okwenzakalayo iyahamba emanzini esiwanathayo isibangele imikhuhlane,” kuxwayisa uNdlovu.
Wazise labo abaphathekileyo kuhlelo lokuhlanza iMaphisa ukuthi kulicala ukulahla izibi endaweni yonke.
“Umthetho wona ngokwawo uthi lo olahla ingcekeza ulakho ukuhlawuliswa imali, imali ongasoze wenelise ukuyibhadala encane yakhona yi $20 USD kukhwela kusiyaphezulu. Ungekela ukuthi uyibhadale uyavalelwa esitokisini usukalapho siyakuhambisa ecourt bakugwebe,” kutsho umnumzana uDescent.
Unxuse nxalo abatshayeli bezimota abathwala abantu eRank ukuthi babumbe ikomiti ezakhangela ngokuhlanzeka kwalapho abasebenzela khona.
Ugcizelele kakhulu ukuqakatheka kwelanga elabekwa ngumongameli welizwe laseZimbabwe umnumzana Emmerson Dambudzo Mnangagwa ngomnyaka ka2018 mhlaka 5 Mpalakazi, yona kuyindlela yokukhuthaza abantu ukuthi bahlanze indawo abahlala kizo.
